दार्चुला। विद्यार्थीहरूलाई सार्वजनिक यातायातमा छुट नदिइएको भन्दै अखिल नेपाल राष्ट्रिय स्वतन्त्र विद्यार्थी युनियन (क्रान्तिकारी) दार्चुलाले जिल्ला प्रशासनलाई ज्ञापन पत्र बुझाएको छ ।
आइतबार दार्चुलाका सहायक प्रमुख जिल्ला अधिकारी मोहनसिंह धामीलाई अनेरास्ववियू क्रान्तिकारीले ज्ञापन दिँदै ध्यानाकर्षण गराएको छ ।
अनेरास्ववियू क्रान्तिकारी दार्चुलाका अध्यक्ष भुवन जोशीले सार्वजनिक यातायातमा यात्रा गर्दा विद्यार्थी परिचयपत्रको आधारमा पाउनुपर्ने ४५ प्रतिशत सहुलियत विभिन्न बाहानमा रोकिएकाले यसको कार्यान्वयनका लागि ज्ञापन बुझाइएको बताए ।
ज्ञापन पत्रमा भनिएको छ– ‘सरकारद्वारा वि.सं. २०६५ सालमै निर्णय गरी आएको विद्यार्थी परिचयपत्रको आधारमा भाडा दरमा ४५ प्रतिशत छुट, सार्वजनिक यातायात व्यवसायीहरूले अहिले बन्द गरेका छन् ।
यो विषयमा जिल्ला प्रशासन कार्यालयको गम्भीर ध्यानाकर्षण गराउँदै तत्काल सरकारको निर्णय कार्यान्वयनका लागि जोडदार माग गर्दछौ ।’ क्रान्तिकारीले एक हप्ताभित्र यो समस्याको समाधान नगरिए चरणबद्ध रूपमा संघर्षमा उत्रने र संघर्षबाट हुने क्षतिको जिम्मा सम्बन्धित निकाय स्वयं हुनुपर्ने चेतावनीसमेत दिएको छ ।