कोरोना भाइरसको संक्रमण बढेपछि भारतको राजधानी नयाँदिल्लीमा पुनः रात्रिकालीन कर्फ्यू लगाइने भएको छ । कोभिडको नयाँ भेरियन्ट ओमिक्रोनका कारण संक्रमितहरुको संख्या बढेपछि राज्य सरकारले आजबाट कर्फ्यू लगाउने भएको हो ।
राति ११ बजेदेखि बिहान ५ बजेसम्म कर्फ्यू लगाउने दिल्ली सरकारले जनाएको छ । भारतमा पछिल्लो २४ घन्टामा ७ हजारमा जना कोभिड संक्रमित भेटिएका छन् । उनीहरुमध्ये ४२२ जनामा नयाँ भेरियन्ट देखिएको छ । नयाँ भेरियन्टका बिरामी र अधिकांश संक्रमित नयाँ दिल्लीमा देखिएका छन् । यसअघि उत्तर प्रदेशमा पनि रात्रिकालीन कर्फ्यू लगाइएको थियो ।
नयाँ दिल्लीबाहेक अन्य शहरहरुमा पनि विभिन्न प्रतिबन्ध लगाइएका छन् । अंग्रेजी नयाँ वर्षमा होटल, रेस्टुराँ, सांगीतिक क्लब लगायतका बढी भिडभाड हुने क्षेत्रहरुमा मानिसहरुको चहलपहल बढ्ने भएकाले विभिन्न राज्यमा निषेधाज्ञा र कर्फ्यू लगाइएको छ ।
ओमिक्रोन भारतका १९ राज्यमा पुगिसकेको छ । हाल ओमिक्रोनका बिरामी ५२५ जना पुगिसकेका छन् । आइतबार मात्रै महाराष्ट्रमा ३१ तथा केरलमा १९ जना नयँ संक्रमित पाइएका छन् ।
त्यसैगरी १५ देखि १८ वर्ष उमेरकालाई ३ जनवरीदेखि भ्याक्सिन लगाइने जनाइएको छ ।
एक महिनाभित्र सबैलाई भ्याक्सिन लगाइने कोभिड १९ टास्क फोर्सका प्रमुख डा. एनके अरोडाले बताएका छन् । त्यस्तै वृद्धवृद्धाले बुस्टर डोजका लागि मेडिकल सर्टिफिकेट बनाउनु पर्नेछ ।