आरिफ शेखले कसिलो बलिङ गरेपछि नेपाल पुलिस क्लबले प्रधानमन्त्री कप पुरुष राष्ट्रि क्रिकेट प्रतियोगितामा सोमबार सुदूरपश्चिम प्रदेशमाथि दुई रनको रोमाञ्चक विजय हासिल गरेको छ ।
मुलपानी क्रिकेट मैदानमा टस हारेर ब्याटिङ गरेको पुलिस क्लबले निर्धारित २० ओभरमा ८ विकेट गुमाएर ९३ रन बनाएको थियो । ९४ रनको लक्ष्य पछ्याएको सुदूरपश्चिमले ९ विकेट गुमाएर ९१ रन मात्र बनाउन सक्यो ।
अन्तिम ओभरमा सुदूरपश्चिमलाई जित्नका लागि ६ रनको आवश्यकता थियो । क्रिजमा सुदूरपश्चिमका हेमन्त धामी ३ र विकाश अग्रीले शून्य रनको स्थितिमा थिए । करण केसीले अन्तिम ओभरमा तीन रनमात्र दिएपछि नेपाल पुलिस क्लबले दुई रनको रोमाञ्चक जित निकालेको हो ।
आरिफले चार ओभरमा ९ रन दिएर चार विकेट लिएका थिए । करण, दीपेन्द्रसिंह ऐरी र पवन सर्राफले एक एक विकेट लिए । सुदूरपश्चिमका लागि ओपनर गजेन्द्र बोहराले २७, नारायण जोशीले २२ र खडक बोहराले १३ रन बनाए । अन्यले दोहोरो अंकमा रन बनाउन सकेनन् ।
त्यसअघि पुलिस क्लबका लागि ओपनर कुशल भुर्तेलले २१ र पवन सर्राफले २० रन जोडे । आरिफ शेखले १० रन जोड्नु बाहेक पुलिसका अन्यले दोहोरो अंकमा रन बनाउन सकेनन् ।
सुदूरपश्चिमका नारायण जोशी र आदित्य महताले समान तीन विकेट लिए । शेर मल्लको नाममा दुई विकेट रह्यो । आजै कीर्तिपुरस्थित त्रिवि क्रिकेट मैदानमा त्रिभुवन आर्मीले कर्णाली प्रदेशलाई ८३ रनले हराएको थियो ।आजै दोस्रो खेलमा एपीएफले प्रदेश दुई तथा बागमतीले लुम्बिनी प्रदेशविरुद्ध खेल्नेछ ।