तनहुँको दमौलीस्थित हार्डवेयर पसलबाट सुरु भएको आगलागी अझै नियन्त्रणमा आएको छैन । आज बिहान करिब १० बजेदेखि सुरु भएको आगलागी नियन्त्रणको प्रयास भइरहेको छ ।
आगो नियन्त्रणका लागि पोखराबाट एउटा दमकल पठाइएको छ । अर्को दमकल पनि पठाउने तयारी भएको जिल्ला प्रहरी कार्यालय कास्कीका प्रमुख रमेश थापाले जानकारी दिए ।
उनका अनुसार काठमाडौंबाट सिम्रिक एयरको हेलिकोप्टर पनि आगलागी नियन्त्रणका लागि पुगेको छ । आगो फैलनेक्रम नरोकिएकोले हेलिकोप्टरबाट समेत पानी खसालेर नियन्त्रणमा लिन लागिएको हो ।
स्थानीय भूपाल हार्डवेयर पसलको गोदामबाट सुरु भएको आगो अर्को हार्डवेयर पसल हुँदै इलेक्ट्रिक पसल र अहिलेसम्म पाँच घरहरूमा समेत सल्किएको प्रत्यक्षदर्शीले बताएका छन् । क्षतिको विवरण आउन बाँकी छ ।