इन्डियन प्रिमियर लिग आईपीएल टी–२० क्रिकेटमा रोयल च्यालेन्जर्स बैंगलोरले दोस्रो जित हासिल गरेको छ ।
गएराति भएको खेलमा बैंगलोरले राजस्थान रोयल्सलाई ४ विकेटले पराजित गरेको हो।
१७० रनको विजयी लक्ष्य पछ्याएको बैंगलोरले १९।१ ओभरमा ६ विकेट गुमाउँदै पूरा गरेको हो । बैंगलोरको जितमा विकेटकिपर दीनेश कार्तिकले सर्वाघिक ४४ रन बनाए ।
शहबाज अहमदले २६ बलमा ४५ तथा दिनेश कार्तिकले २३ बलमा अविजित रहँदै ४४ रन बनाए । पूर्व कप्तान विराट कोहलीले भने मात्र ५ रन बनाए । राजस्थानका ट्रेन्ट बोल्ट र युजभेन्द्र चहलले २–२ विकेट लिए ।
यसअघि मुम्बईको वानखडे स्टेडियममा टस हारेर पहिले ब्याटिङ गरेको राजस्थानले २० ओभरमा ३ विकेट गुमाउँदै १६९ रनको योगफल तयार पारेको थियो ।
राजस्थानका ओपनर जोस बटलरले ४७ बलमा अविजित रहँदै ७० रन बनाए । शिम्रन हेटमायरले ३१ बलमा अविजित रहँदै ४२ रनको योगदान गरे ।
बेंगलोरका डेविड विल्ली, वानिन्दु हसरंगा र हर्षल पटेलले समान १ विकेट लिए ।
बैंगलोरको यो दोस्रो जित हो भने राजस्थानको पहिलो हार हो ।
अंक तालिका अहिलेसम्म ३ खेलबाट ४ अंकको राजस्थान शीर्ष स्थानमा कायमै रहेको छ । ३ खेलबाट ४ अंककै कोलकाता नाइट राइडर्स दोस्रो स्थानमा छ ।
अहिलेसम्मको एकमात्र अपराजित टिम गुजरात टाइटान्स २ खेलबाट ४ अंकसहित तेस्रो स्थानमा छ ।
पंजाब किंग्स, लखनउ सुपर जाइन्टस र बैंगलोरको समान ४–४ अंक छ ।
दिल्ली क्यापिटल्सको २ खेलबाट २ अंक छ ।
आईपीएलका सबैभन्दा सफल टिमहरु चेन्नई सुपर किंग्स, मुम्बई इन्डियन्ससहित सनराइजर्स हैदराबादले अंकको खाता खोलेका छैनन् ।
आज बेलुकी कोलकाता र मुम्बईबीच पुनेमा खेल हुनेछ ।