धनगढीका रिक्सा चालकहरु आन्दोलित

धनगढी खबर    

धनगढीका रिक्सा चालकहरु आन्दोलित

धनगढी ।  धनगढीमा सेवा ठप्प पारेर विद्युतीय रिक्सा चालकहरु आन्दोलनमा उत्रिएका छन् । सरकारले विद्युतीय रिक्सा चालक अनुमती पत्रको आवेदन पत्रको परीक्षा नखोलेको अवस्थामा ट्राफिक प्रहरीले दैनिक जरिवाना कटाउन थालेको भन्दै उनीहरु आन्दोलित भएका छन् ।

चालकहरुले धनगढी उपमहानगरपालिका कार्यालय परिसरदेखि एलएन चोकसम्म रिक्साहरु लामवद्ध पारेर प्रहरी ज्यादतीविरुद्ध बिहानैदेखि एलएन चोकमा प्रदर्शन गरेका छन् ।

यातायात व्यवस्था कार्यालयले अटो रिक्सा चालक अनुमती पत्रको आवेदन नखोल्ने तर लाइसेन्स नभएको भन्दै ट्राफिक प्रहरीले दैनिकजसो पाँच सय रुपैयाँदेखि १५ सय रुपैयाँ जरिवाना तिराउन थालेपछि आन्दोलन गर्न बाध्य भएको धनगढीको बोराडाँडीका अटो रिक्सा चालक देवराज अवस्थीले बताए ।

‘ट्राफिक प्रहरीले लाइसेन्स खोइ भन्दै दैनिक जरिवाना काटिरहेको छ । यातायात कार्यालयमा जादा लाइसेन्स खोलेको छैन भन्छन्,’ अवस्थीले भने, ‘अब हामीले के गर्ने रु कहिले कही त दिनमा दुई पटकसम्म जरिवाना तिर्नुपरिरहेको छ ।’

यस्तै विद्युतीय रिक्सा चालक संघका अध्यक्ष मिनराज जोशीले धनगढी उपमहानगरपालिकाले नगर क्षेत्रमा चल्ने विद्युतीय रिक्साको पहिचान गरेर व्यवस्थापन गर्नुपर्ने, शीघ्र चालक अनुमती पत्र ( लाइसेन्स)  वितरणको प्रक्रियामा जानुपर्ने माग राख्दै आन्दोलन गर्न परेको बताए ।

उपमहानगरपालिका र यातायात व्यवस्था कार्यालयले माग सम्बोधन गर्न तयार नभए अनिश्चितकालीन आन्दोलनका कार्यक्रम ल्याउनेसमेत  गर्ने चेतावनी अध्यक्ष   जोशीले दिए ।



आइतबार १५, साउन २०७९ ०१:२९ मा प्रकाशित

Loading...

प्रतिकृया दिनुहोस