धनगढी। सुदूरपश्चिम प्रदेश सरकारले अतवारी पर्वको अवसरमा दिएको बिदाको मिति संशोधन गरेको छ । प्रदेश सरकारले थारु समुदायको अतवारी पर्वको अवसरमा दिएको बिदाको मिति संशोधन गरेर भदौ १२ गते कायम गरेको छ ।
थारु समुदायको बसोबास रहेको कैलाली, कञ्चनपुरमा सार्वजनिक बिदा लागू हुने गरी यसअघि, २०७८ चैत २२ गतेको मन्त्रिपरिषद्को बैठकले अतवारी पर्वको बिदा भदौ १९ गते दिने निर्णय गरेको थियो । तर बिहीबार बसेको मन्त्रिपरिषद् बैठकले अतवारी पर्वको बिदा भदौं १२ गते दिने निर्णय गरेको हो । तिथिमिति अनुसार अतवारी पर्व भदौ १२ गते परेको भन्दै थारु कल्याणकारिणी सभा कैलालीले बिदाको मिति संशोधन गर्न माग गरेको थियो ।
थारु कल्याणकारिणी सभा कैलालीले बिदाको मिति संशोधन गर्न माग गरेपछि प्रदेश सरकारको सो निर्णयलाई आन्तरिक मामिला तथा कानून मन्त्रालयले राजपत्रमा प्रकाशित गरेको छ । आउँदो आइतबार र सोमबार दुई दिन थारु समुदायले अतवारी पर्व मनाउने जनाइएको छ ।