विगतका वर्षभन्दा केही ढिलो गरी यस वर्षको मनसुन पश्चिम नेपालबाट बाहिरिएको छ । जल तथा मौसम विज्ञान विभागले आज पश्चिम नेपालबाट यस वर्षको मनसुन बाहिरिएको जनाएको छ ।
विभागको मौसम पूर्वानुमान महाशाखाका अनुसार सुदूरपश्चिम, कर्णाली, लुम्बिनी, गण्डकी, बागमती र मधेश प्रदेशको पश्चिमी भूभागबाट बाहिरिएको हो ।
देशका अन्य भूभागमा मनसुन बाहिरिन अझै केही दिन लाग्ने महाशाखाले जनाएको छ । नेपालमा सरदर २ अक्टुबरमा मनसुन बाहिरिने गरेको छ ।
यस वर्ष भने औषतभन्दा केही दिन ढिलो गरी मनसुन बाहिरिन शुरू गरेको हो । यस वर्ष गत जेठ २२ गते पूर्वी नेपालबाट मनसुन प्रवेश गरेको थियो ।