कैलाली क्षेत्रनम्बर ५ मा आज मतगणना नहुने भएपछि स्वतन्त्र उम्मेदवार पुष्करनाथ ओझा रुष्ट बनेका छन् ।
केहीबेरमा उनले पत्रकार सम्मेलन गर्दै आफ्नो धारणा राख्ने भएका छन् ।
मुख्य निर्वाचन कार्यालयले भर्खरै एक विज्ञप्ति जारी गर्दै मतगणना बुधबार बिहान ८ बजेबाटमात्रै सुरु हुने जनाएको छ ।
आज भएको सर्वदलीय बैठकमा दिउँसो १ बजेदेखि मतगणना गर्ने सहमति भएको थियो ।
मुख्य निर्वाचन अधिकृतको स्वास्थ समस्याको कारण देखाउदै दिउँसो ३ बजेसम्म दलहरूसँग समय मागेका थिए । तर साढे ४ बज्दा समेत मतगणना सुरु नभएपछि नाराबाजी समेत भएको थियो ।
सर्वदलीय बैठकमा सत्तारूढ गठबन्धनले वडागत रूपमा गणना गर्नुपर्ने र एमालेसहितका अन्य दलले सगोलरूपमा गणना गर्न माग गरेपछि विवाद उत्पन्न भएको थियो ।
सोही क्रममा उनी ढलेपछि चिकित्सकलाई बोलाएर स्वास्थ्य परीक्षण गरिएको थियो ।
जिल्ला निर्वाचन कार्यालय कैलालीका प्रमुख प्रेम भट्टले मुख्य निर्वाचन अधिकृत ओमप्रसाद अर्याल बिरामी परेपछि मतगणना भोलि गर्ने निर्णय गरिएको बताए ।
कैलाली- ५ मा गठबन्धनबाट कांग्रेसका डिल्लीराज पन्त, एमालेका नारदमुनि राना र स्वतन्त्र उम्मेदवार पुष्करनाथ ओझासहित ११ जना चुनावी प्रतिस्पर्धामा छन् ।