बाजुरा। बाजुराका चेतन ऐडीको हत्याका दोषीलाई सरकारले संरक्षण गरेकोभन्दै अनेरास्ववियुले बिभिन्न मागसहित प्रदर्शन गर्ने भएको छ । मंसिर ४ गते बाजुरामा निर्वाचनको दिन भएको चेतन ऐडी हत्या घटनाको दोषीलाई कारबाही गर्न मागसहित प्रदर्शन गर्ने जनाएको छ । अनेरास्ववियुका महासचिव समिक बडालले एक विज्ञप्ति जारी गर्दै घटनाको दोषीलाई कारबाही गर्न सरकारसँग माग गर्दै संर्घका कार्यक्रम गर्ने जनाएका छन् ।
विज्ञप्तिमा मार्फत भनिएको छ, ‘निर्वाचनको दिन बाजुराको त्रिवेणी नगरपालिका ७ स्थित मतदान स्थलमा भएको विवादलाई विषयान्तर गरी सत्ता गठबन्धनका अराजक गुन्डाहरूले सोही दिन राति आफ्नै घरमा सुतिरहेको बेला अनेरास्ववियु केन्द्रीय कमिटी सचिवालय सदस्य एवम् अनेरास्ववियु सुदूरपश्चिम विश्वविद्यालय राष्ट्रिय कमिटी अध्यक्ष क। चेतन ऐडीको बीभत्स हत्या गरिएको घटनाप्रति अनेरास्ववियुले मंसिर ५ गते नै विज्ञप्ति मार्फत नेपाल सरकारको ध्यानाकर्षण गराएको सर्वविदित नै छ।’ सरकारले चेतन ऐडीको हत्यामा संलग्नहरूलाई कारबाही गर्नुको साटो सत्ताको दुरुपयोग गरी अपराधीहरूलाई संरक्षण गरेको आरोप लगाएका छन्।
अपराधीलाई कारबाही गर्नुपर्ने माग गर्दै शान्तिपूर्ण प्रदर्शन गरिरहेका अनेरास्ववियु बाजुरा जिल्ला अध्यक्ष लगायतका नेताहरूलाई गिरफ्तार गरी झुटो मुद्दा लगाई प्रहरी हिरासतमा राख्नुले प्रहरी र सरकारले नियोजित रूपमा नै अपराधीहरूलाई संरक्षण गरेको दाबी गरेका छन्। उनीहरुले मंसिर १३ गते प्रमुख जिल्ला अधिकारी मार्फत प्रधानमन्त्रीलाई ज्ञापन पत्र बुझाउने, मंसिर १४ गते प्रत्येक जिल्ला सदरमुकाममा प्रदर्शन गर्ने र मंसिर १५ गते देशैभरका क्याम्पसमा कालो ब्यानर राख्ने र हस्ताक्षर संकलन गनेरु माग सम्बोधन नभए थप संर्घषका कार्यक्रम गरिने विज्ञप्ति मार्फत उल्लेख गरिएको छ।