दिपायल सिलगढी नगरपालिकाले पुर्विचौकी गाउँपालिकाका भूकम्प प्रभावितहरूका लागि तीन लाख आर्थिक सहयोग गरेको छ ।
सोमवार नगर प्रमुख बाजी खड्काले गाउँपालिका अध्यक्ष रामप्रसाद उपाध्यायलाई चेक हस्तान्तरण गर्नुभएको हो । बिहीबार बसेको नगर कार्यपालिकाको बैठकले भूकम्प प्रभावितलाई आर्थिक सहयोग गर्ने निर्णय गरेको थियो ।
दुख पिडामा रहेकालाई सक्दो सहयोग गर्नु मानवता भित्र पर्ने प्रमुख खड्काले बताउनुभयो । भूकम्पबाट गाउँपालिकामा ठुलो क्षति पुर्याएको अवस्थामा दुखमा नगरपालिका गाउँपालिका सँगै भएको महसुस गराउन सानो सहयोग गरेको उहाँको भनाइ छ । प्रभावितहरूका लागि विभिन्न संघसस्थाबाट सहयोग प्राप्त भइरहेको र त्यसलाई एकद्वारा प्रणालीद्वारा वितरण गरिने गाउँपालिकाका अध्यक्ष उपाध्यायले बताउनुभयो ।
स्थानीय सरकारमा कांंठमाडौ महानगरपालिकाले १० लाख र दिपायल सिलगढी नगरपालिकाले ३ लाख आर्थिक सहयोग गरेको छ । हाल प्रभावित त्रिपालमुनि बसिरहेका छन् । भूकम्पबाट क्षति पुगेको ठाउँ खप्तडसँगै जोडिएको हुनाले यहाँ हिउँ पर्ने समय हुनै लागेकोले पनि चाँडै अस्थायी टहरा निर्माण गर्ने तयारी भइरहेको अध्यक्ष उपाध्यायले बताउनुभयो ।