खाद्य प्रविधि तथा गुण नियन्त्रण कार्यालय धनगढीले धनगढीमा होटलहरुलाई खाद्य स्वच्छताका आधारमा स्तरीकरण गर्न शुरु गरेको छ । होटलमा खाद्य स्वच्छता खाद्यान्नको गुणस्तर, सरसफाई र भान्छाको अवस्थाका आधारमा स्तरीकरण गरिन थालिएको हो ।
मंगलबार धनगढी उपमहानगरपालिकाका प्रमुख नृप बहादुर वडले चटकपुरस्थित होटल फ्लोरामा दुई वटा तारा भएको हरियो स्टिकर टाँस्दै स्तरीकरण अभियानको शुभारम्भ गर्नुभयो ।
खाद्य प्रविधि तथा गुण नियन्त्रण कार्यालयले बिभिन्न ५० वटा मापदण्ड तयार गरी त्यसका आधारमा होटलहरुलाई स्तरीकरण गर्ने गर्छ । फ्लोरा होटलले ५० वटा मापदण्ड मध्ये अधिकांश पुरा गरेको आधारमा उसलाई ख स्तरको उत्तम होटलको रुपमा स्तरीकरण गरिएको छ ।
पहिलो चरणमा आवासीय सुविधा भएका होटलहरुलाई स्तरीकरण गरिएको र क्रमशः रेष्टुरेण्ट र अन्य खाजा पसलहरुलाई पनि स्तरीकरण गरिने खाद्य प्रविधि तथा गुण नियन्त्रण कार्यालय धनगढीका बरिष्ठ खाद्य अनुसन्धान अधिकृत सुमन धितालले बताउनुभयो ।
होटलहरुलाई स्तरीकरण गर्नु पूर्व खाद्य प्रविधि तथा गुण नियन्त्रण कार्यालयको टोलीले होटलहरुमा ५० वटा मापदण्ड पुरा भए नभएको अनुगमन गर्ने गरेका छन् ।
होटल ब्यवसायी संघ कैलालीको समन्वयमा स्तरीकरण गर्ने काम शुरु गरिएको हो । नेपाल घुम्न आउने पर्यटकहरु खाद्य स्वच्छताको अभावले खानाकै कारण बिरामी परेर नेपाल बसाई छोट्ट्याएर फर्कन थालेपछि खाद्य स्वच्छताका आधारमा स्तरीकरण गर्ने अभियान शुरु गरिएको हो ।