बैतडी । महाकाली करिडोरले बैतडीमा सिँचाइ कुलो भत्काएपछि खेत बाँझै रहेको छ । जिल्लाको पञ्चेश्वर गाउँपालिका–२ को बज्वागडा स्कुल अगाडीबाट करिडोर खन्दा कुलो पुरिएपछि किसानको खेत बाँझै रहेको हो ।
सिचाइँ कुलो पुरिएपछि वर्षको तीन बाली उत्पादन हुने पञ्चेश्वरका डिम्मर, मटयानीलगायतका खेत अहिले बाँझै रहेका स्थानीय धनसिंह मङ्गोलाले बताए । अहिले डिम्मर र मटयानीका किसानहरुको खेत बाँझै रहेको बताइएको छ ।
यसअघि खेतमा गहुँ पाक्न लागेको बेला करिडोरको माटोले कुलो पुरेपछि गहुँको उत्पादनमा समेत कमी आएको स्थानीय रामसिंह मङ्गोलाले बताए । वडा अध्यक्ष बिर बहादुर चन्दले पनि करिडोरले सिँचाइ कुलो भत्किएपछि किसानहरुका खेत बाँझै रहेका बताए ।
कुलो निर्माणका लागि सिँचाई डिभिजन कार्यालय पाटनबाट योजना परेको भएपनि करिडोरमा काम भैरहेकाले बनाउन नसकिएको वडा अध्यक्ष चन्दले बताए । सो क्षेत्रमा काम सकिएपछि सिँचाई कुलो निर्माण गरिने उनले बताए ।
नेपाल, भारत र चिनसित जोड्ने र त्रिदेशीय नाकाका रूपमा विकास गर्ने अवधारणाका साथ डेढ दशकअघि करिडोर निर्माण थालिएको हो । महाकाली करिडोरले कञ्चनपुर, डडेल्धुरा, बैतडी र दार्चुलालाई जोड्ने छ।