बाजुरा । जिल्लाको पूर्वी उत्तर क्षेत्रमा पर्ने जगनाथ गाउँपालिकाको अवरुद्ध भएको भुवा खोला लघु जलविद्युत यतिबेला पुन सञ्चालनमा आएको छ ।
साउन २९ गते राती परेको अविरल बर्सातका कारण नहरमा पहिरो गएपछि केही यता सो भुवा खोला लघु जलविद्युत अवरुद्ध बनेको थियो । अहिले स्थानीयको श्रमदानमा सो भत्किएको नहर मर्मत गरेपछि भुवा खोला लघु जलविद्युत पुन सञ्चालनमा आएको हो ।
जगनाथ गाउँपालिका वडा ५ का अध्यक्ष तथा स्वास्थ्य प्रमुख सन्तबहादुर शाहीको पहलमा यहाँका स्थानीयले नहर मर्मत गरेपछि विद्युत सञ्चालनमा आएको जगनाथ गाउँपालिकाले जनाएको छ । २०७० सालमा यो गाउँपालिकामा बत्ती बले पनि २०७९ असोज १९ देखि २५ गते आएको अविरल वर्षाका कारण भुवा खोला जलविद्युतको नहर भत्किँदा पहिला पनि यहाँका स्थानीयलाई अँध्यारोमा टुक्की बाल्दै आउनु परेको थियो ।
२०८० जेठ २२ गते वैकल्पिक ऊर्जाको ५० लाख गाउँपालिकाको पाँच लाख र सुदूरपश्चिम सरकारको २० लाखमा सो विद्युत्को नहर मर्मत भएपछि गाउँमा बिजुली बलेको थियो । भुवा खोलामा उत्पादन भएको एक सय किलोवाटको विद्युत्बाट स्वामिकार्तिक २ र जगनाथ गाउँपालिकाका ५ र ६ गरी झन्डै एक हजार भन्दा भन्दा बढी घरपरिवार लाभान्वित भएको जगनाथ गाउँपालिका वडा नम्बर ५ का वडा अध्यक्ष गौरी सार्कीले बताए ।