धनगढी । सुदूरपश्चिम प्रदेश स्तरीय १४ औँ राष्ट्रपति रनिङ शिल्ड प्रतियोगितामा कैलाली विजयी भएको छ । धनगढी रङ्गशालामा सम्पन्न भएको प्रतियोगितामा कैलालीले ६४ पदक सहित विजयी भएको हो ।
कैलालीले ३१ स्वर्ण, १८ रजत र १५ कास्य सहित ६४ पदक ल्याएर उपाधि जित्न सफल भएको छ । यस्तै कन्चनपुर दोस्रो र डडेल्धुरा तेस्रो भएको छ ।
कन्चनपुरले १९ स्वर्ण, १८ रजत र १५ कास्य गरी ५२ पदक र डडेल्धुराले ७ स्वर्ण, १० रजत र १६ कास्य गरी ३३ पदक सहित तृतीय भएको हो ।
प्रतियोगितामा प्रथम, द्वितीय र तृतीय जिल्लालाई सुदूरपश्चिम खेलकुद परीसदका सदस्य सचिव दीपक बहादुर सिंहले नगद पुरस्कार सहित ट्रफि, मेडल र प्रमाणपत्र प्रदान गरेका थिए ।
प्रतियोगितामा सहभागी अन्य बैतडीले ५ स्वर्ण, २ रजत र १० कास्य गरी १७ पदक, बझाङले २ स्वर्ण, ४ रजत र १३ कास्य गरी १९ पदक, बाजुराले १ स्वर्ण, ६ रजत र १३ कास्य गरी २०, अछामले १ स्वर्ण, १ रजत र ६ कास्य गरी ८, दार्चुलाले ४ रजत र ३ कास्य गरी ७, र डोटीले ३ रजत र ८ कास्य गरी ११ पदक जितेका छन् ।
प्रतियोगितामा भलिबल, कबड्डी, एथलेटिक्स, तेक्वान्दो र कराँते विधामा प्रतिस्पर्धा गराइएको थियो । प्रतियोगितामा उत्कृष्ट भएका विद्यार्थीहरू मध्येबाट केन्द्रमा हुने राष्ट्रपति रनिङ शिल्ड प्रतियोगितामा सहभागी गराइने प्रदेश खेलकुद परीसदले जनाएको छ । विगत ४ वर्षदेखि राष्ट्रपति रनिङ शिल्ड प्रतियोगिता कैलालीले जित्दै आएको छ ।