धनगढी । पीडितलाई न्याय र पुनर्स्थापनाका लागि मानव अधिकार सहायता कक्षले समन्वय गर्नुपर्नेमा सरोकारवाला निकायले जोड दिएका छन् ।
अनौपचारिक क्षेत्र सेवा केन्द्र (इन्सेक) सुदूरपश्चिम प्रदेश कार्यालय, धनगढीको आयोजनामा मानव अधिकार सहायता कक्ष सवलीकरण विषयक छलफल कार्यक्रम सहभागीले यस्तो बताएका हुन् ।
डिसिए परियोजनाका कार्यक्रम प्रबन्धक सूर्यकुमारी विश्वकर्माले जोखिममा परेका मानव अधिकार रक्षकहरूलाई सहयोग गर्न मानव अधिकार सहायता कक्षमा निर्णय गर्न सकिने बताइन ।
'वास्तविक पीडितलाई न्याय मात्र नभई पीडितको सुरक्षा र पुनर्स्थापनाका लागि पनि मानव अधिकार सहायता कक्षले समन्वय गरेर जानु पर्छ' उनले भनिन् - यसका लागि संघ संस्थाहरूसँग समन्वय गर्न सकिन्छ ।'
उनले दूरदराजमा रहेका पीडितहरूको न्यायमा सहजताका लागि सुरक्षित आवासका लागि सेफ हाउस सञ्चालन गरिरहेको संघ संस्थाहरूसँग समन्वय गर्न सकिने बताइन् ।
राष्ट्रिय मानव अधिकार आयोगका अधिकृत गणेश जोशीले जोखिममा परेका मानव अधिकार रक्षकहरूले मानव अधिकार सहायता कक्षमा उजुरी दिन आग्रह गरे । उनले मानव अधिकार सहायता कक्ष मार्फत काम गर्ने दौरानमा विभिन्न जोखिममा परेका मानव अधिकार रक्षकहरूलाई सहयोग गर्न सकिने र मानव अधिकार रक्षकहरूको अभिलेखीकरण गर्न राष्ट्रिय मानव अधिकार आयोगले जिम्मा लिनु पर्ने बताए ।
दलित महिला अधिकार मंचकी अध्यक्ष सावित्रा घिमिरेले समुदायसंग जोडिएर काम गरिरहेका स्वयंसेविका, शिक्षक, मेलमिलाप कर्ताहरूलाई पनि उनीहरूको जोखिमको पहिचान गर्नुपर्ने बताइन् । उनले मानव अधिकार सहायता कक्ष मार्फत सहयोग गर्न सकिने वातावरण सृजना गर्न निर्देशिका परिमार्जन गर्नुपनमा जोड दिइन् ।
गैरसरकारी संस्था महासंघका अध्यक्ष तथा मानव अधिकार सहायता कक्ष व्यवस्थापनका अध्यक्ष देवी खनालले मानव अधिकार सहायता कक्ष मार्फत पीडितलाई सहयोग गरेको फाइल अनुमोदन गर्नु पर्ने बताए । यस सञ्जालका सदस्यहरुलाई सूचना सम्प्रेषण गर्न डिजिटल ग्रुप बनाउनु पर्ने र हाल सम्म मानव अधिकार सहायता कक्ष मार्फत सहयोग पाएका पीडितहरूको अवस्थाबारे जानकारी लिन र अभिलेखीकरण गर्नु पर्ने बताए ।
पत्रकार महांसंघका पूर्व अध्यक्ष अर्जुन शाहीले मानव अधिकार सहायता कक्षलाई प्रभावकारी सूचनामय बनाउन डिजिटल समूह बनाएर सूचना सम्प्रेषण गर्न आवश्यक रहेको बताए ।
समय अवधि भित्र खर्च हुन नसेका रकम आपतकालिन कोष वा कुनै कोषमा जम्मा हुने गरी निर्देशिका बनाउनु पर्ने ओरेक नेपालका कार्यक्रम संयोजक गीता चौधरीले बताइन् । उनले मानव अधिकारको क्षेत्रमा काम गर्दा दुर्घटनामा परेका मानव अधिकार रक्षकहरूको उपचारमा सहयोग गर्न सके यो सहायता कक्ष अझ प्रभावकारी हुने बताइन् ।
सिविन नेपालको प्रमुख हरीलाल चौधरीले पीडितलाई न्याय लागि मात्र नभई दूर दराजमा रहेका पीडितको उद्धारको लागि यातायातको व्यवस्था भए मानव अधिकार सहायता कक्ष पीडित मैत्री हुने बताए ।
इन्सेक सुदूरपश्चिम प्रदेश संयोजक खडकराज जोशीले मानव अधिकार सहायता कक्ष मार्फत विभिन्न हिंसा प्रभावितलाई न्यायमा पहुँच पु¥याउने उद्देश्यले पीडितलाई छनौट गरी सहयोग गर्दै आइरहेको बताए । उनले कानुनी प्रक्रियामा गएका र सम्बन्धित वडाको सिफारिस तथा पीडितको निवेदन र अन्य कागजातको आधारमा सहयोग गर्दै आइरहेको बताए ।