भारत सरकारले आफूले नेपाली भूमि नमिचेको दाबी गरेको छ । बिहीबार भारतीय विदेश मन्त्रालयमा आयोजित नियमित पत्रकार सम्मेलनमा भारतीय विदेश मन्त्रालयका प्रवक्ता रवीश कुमारले भारतले जारी गरेको नयाँ नक्सामा नेपालसँगको सीमामा कुनै परिवर्तन नगरिएको जानकारी दिएका छन् ।
‘हाम्रो नक्सामा भारतीय सार्वभौम भूभाग मात्रै दर्शाइएको छ । नयाँ नक्सामा नेपालसँगको सीमामा कुनै संशोधन गरिएको छैन’, विदेश मन्त्रालयका प्रवक्ता रवीश कुमारले भने । तर उनले नेपालसँग रहेको सीमा विवाद भने दुई पक्षीय संयन्त्रबाट समाधान गर्ने प्रयास भैरहेको बताए ।
‘हामी हाम्रो निकट र मैत्रीपूर्ण द्विपक्षीय सम्बन्धको भावनालाई कदर गर्दै वार्ताको माध्यमबाट सीमा विवाद समाधान हुनुपर्छ भन्ने प्रतिबद्धता दोहोर्याउन चाहन्छौँ । साथै दुई देशबीच मतभेद पैदा गर्न खोज्ने निहीत स्वार्थका विरुद्ध दुवै देश लड्नुपर्ने छ’, प्रवक्ता कुमारले भने ।
भारतीय विदेश मन्त्रालयका प्रवक्ता रवीश कुमारले कसैको उक्साहटमा भारत–नेपालबीच पछिल्लो समय सीमा विवाद बढेकोतर्फ संकेत गरेका छन् । गएको शनिबार भारतीय गृह मन्त्रालयले सार्वजनिक गरेको नयाँ राजनैतिक नक्सामा दार्चुला जिल्लाको लिपुलेक, लिम्पियाधुरा र कालापानी क्षेत्रलाई पनि समेटेपछि नेपालमा भारतविरुद्ध आक्रोश बढ्दो छ ।
नेपाल सरकारले पनि बिहीबार कालापाली, लिपुलेक र लिम्पियाधुरा नेपाली भूमि रहेको भन्दै भारत एक्लैको निर्णय नमान्ने स्पष्ट पारेको छ । बिहीबार परराष्ट्र मन्त्रालयले प्रेस विज्ञप्तिमार्फत कालापाली, लिपुलेक र लिम्पियाधुरा नेपाली भूमि रहेको भन्दै भारतसँगको सीमा विवाद वार्तामार्फत समाधान हुनुपर्ने स्पष्ट पारेको थियो ।
लामो समयदेखि भारतले अतिक्रमण गरेर राखेको यो क्षेत्र अहिले भारतले औपचारिक रुपमा नै राजनीतिक नक्सामा समेटेको हो । भारत सरकारले ३१ अक्टोबरदेखि अस्तित्वमा आएका दुई भिन्ना भिन्नै केन्द्रशासित प्रदेश (युनियन टेरिटोरी) जम्मू–कश्मीर र लद्दाखसहितको देशको औपचारिक राजनीतिक नक्सा गएको शनिबार सार्वजनिक गर्दा नेपालको भूभाग पनि आफ्नो सीमाभित्र मिसाएको छ ।