बझाङ । बझाङको सेती नदी किनारमा बुधवार दिउसो मृत अवस्थामा फेला परेकी महिलाको शव पहिचान भएको छ । वेवारिसे अवस्थामा भेटिएको शव जिल्लाको तलकोट गाउँपालिका–३ बस्टिकी २६ वर्षीया धनलक्ष्मी भण्डारी रोकायाको रहेको जिल्ला प्रहरी कार्यालय बझाङका प्रहरी नायव उपरीक्षक रुपक खड्काले जानकारी दिए ।
धनलक्ष्मी असोज ८ गते रातीबाट सम्पर्क विहीन भएपछि जिल्ला प्रहरी कार्यालय र जिल्लाका सञ्चार माध्यममा सूचना समेत जारी गरेको आफन्तले बताएका छन् । भण्डारी आज दिउसो २ बजे बझाङको जयपृथ्वी नगरपालिका– १० पानकोट स्थित पुलको मुनी सेती नदी किनारमा मृत अवस्थामा फेला परेकी हुन् ।
धनलक्ष्मी असोज ८ गते राती घरबाट एक्कासि बेपत्ता भएकी घरपरिवारले बताएको प्रहरीले जनाएको छ । घटनाको थप अनुसन्धान भइरहेको जिल्ला प्रहरी कार्यालय बझाङले जनाएको छ । मृतक महिलाका श्रीमान् भारत बस्दै आएका र २ छोरा घरमै रहेको प्रहरीले बताएको छ ।
शव पोष्टमार्टमको लागि जिल्ला अस्पताल सिमखेत पठाएको र घटना बारे थप अनुसन्धान भइरहेको समेत प्रहरीले जनाएको छ ।